Lewenslank nadat hy man doodslaan
2009-09-04 10:35

’nSweiser wat ’n “kille daad” teen betaling gepleeg het deur ’n argitek so te slaan dat hy gesterf het, is gister lewenslange tronkstraf opgelê.

Sarel Frederick Jacobs (52) van Doornpoort, Pretoria, is in die hooggeregshof in die stad aan die moord op mnr. Gerrie
Bothma (62), ’n Pretoriase argitek, skuldig bevind.

Mnr. Deon van Vuuren het Jacobs gehuur om Bothma aan te rand.
Van Vuuren het gister vrywaring van vervolging verkry.

Bothma se vrou en gesin het in daardie tyd by Van Vuuren gewoon.

Bothma het glo sy vrou geteister.

Van Vuuren het vir die staat getuig. Hy het erken dat hy Jacobs betaal het om Bothma af te skrik.
Regter André Louw en sy assessor het bevind Van Vuuren word gevrywaar van vervolging op aanklag van moord en diefstal nadat hy eerlik en openlik getuig het.

Die hof het bevind mnr. Ernie Meyer (20), Jacobs se vriend, het vals getuienis afgelê sodat Jacobs ’n alibi kon hê.
Vir dié meineed stel Meyer hom bloot aan strafregtelike vervolging deur die direkteur van openbare vervolging.

Jacobs is daaraan skuldig bevind hy het Bothma op 11 Junie 2005 in Centurion vermoor op grond van dolus eventualis (opset by moontlikheidsbewussyn). Jacobs moes voorsien het dat hy Bothma se dood kon veroorsaak.

Hy is skuldig aan diefstal omdat hy Bothma se pinkiering, ID, beursie en kaarte gevat het om aan Van Vuuren te bewys dat hy “die werk” gedoen het. Van Vuuren het vóór die voorval R10 000 aan Jacobs betaal.
’n Tweede R10 000-betaling is twee dae ná die voorval gedoen.

Jacobs het Van Vuuren afgepers om hom ’n verdere R10 000 op 20 Junie 2005 te betaal.

Jacobs is ook aan afpersing skuldig bevind. Hy het hierop skuld beken.

Louw het gesê Jacobs het Bothma só aangerand dat hy nie kon praat nie. Sy lyk is die volgende dag gevind.

Bothma het onherkenbaar vermink in lang gras gelê. Hy het 16 stompgeweldbeserings gehad, asook “verdedigingstipe”-beserings op sy arms en hande en twee skedelfrakture.

Die regter het gesê Jacobs het ’n kille daad gepleeg teen betaling. Jacobs het “gelieg tot aan die einde”. Hy het selfs sy vriend (Meyer) as ’n alibi gebruik.

Louw het gesê bykans drie jaar ná die voorval het Meyer die eerste keer gehoor van die moordklag teen Jacobs. Meyer het “spontaan” aangebied om Jacobs se alibi te wees.

Adv. Jan Huysamen, namens Jacobs, het gesê Jacobs “is ’n man wat sweiswerk doen, met sy hande werk”.